Мәжілісте Экология мәселелері және табиғатты пайдалану комитетінің төрағасы Еділ Жаңбыршиннің жетекшілігімен «Жер қойнауы және жер қойнауын пайдалану туралы» кодекске енгізілетін түзетулердің таныстырылымы өтті, – деп хабарлайды satmedia.kz тілшісі ҚР Парламенті Мәжілісінің баспасөз қызметіне сілтеме жасап.

Мемлекет басшысының тапсырмаларын іске асыруға бағытталған заң жобасына Мәжіліс депутаттары Альберт Рау мен Константин Авершин бастамашы болды.

Жобаның негізгі мақсаты – жер қойнауын пайдалану саласындағы ашық әрі бәсекелестік тәртіпті нығайту. Сондай-ақ жер қойнауын пайдаланудың бірыңғай порталын «бірыңғай терезе» ретінде заңнамалық тұрғыдан реттеу.

Жер қойнауын пайдалану саласында не өзгереді?

1. Онлайн-аукцион арқылы қатты пайдалы қазбаларға қол жеткізу механизмі жер қойнауын пайдалану құқықтары тоқтатылған немесе жарамсыз деп танылған барлық жағдайды қамтитын болады.
2. Ашық қараусыз, конкурссыз және қол қою бонустарына жоғары ақы төленген жобалар бойынша жер қойнауына құқықтар тексеріліп, қайтарып алынған соң олар бойынша жер қойнауы учаскелері тек аукцион арқылы ғана берілетін болады;
3.Қатысушылардың теріс пайдалану мүмкіндігін жою үшін аукцион механизмі күшейтіледі;
4. «Алғашқы өтінім» қағидатының механизмі бірыңғай портал арқылы тікелей жүзеге асырылады. Осылайша, қажетті блоктарды екі сатылық және құпия таңдау алынып тасталады;
5. Қатты пайдалы қазбаларды тәжірибелік-өнеркәсіптік өндіру деген сылтаумен жасырын өндіруге тыйым салынады.

Түзетулерді талқылау жұмыс тобының отырыстарында жалғасады. Оған Экология мәселелері және табиғат пайдалану комитетінің мүшесі Арман Қалықов жетекшілік етеді.

Дереккөз: ҚР Парламенті Мәжілісінің баспасөз қызметі