Қазақстанның бастамасы бойынша Женевадағы БҰҰ-ның жоғары апталығы аясында Халықаралық гуманитарлық құқыққа саяси бейілділікті нығайту жөніндегі жаһандық бастаманың негізгі бағыттарының тұсаукесері өтті. Жоғары деңгейдегі іс-шара алты бастамашы елдің – Бразилия, Иордания, Қытай, Қазақстан, Франция және Оңтүстік Африка елдерінің, сондай-ақ Халықаралық Қызыл крест комитетінің атынан ұйымдастырылды.
Өз мәлімдемелерінде алты елдің тұрақты өкілдері гуманитарлық тректе жұмыс істеу басымдықтарымен бөлісіп, халықаралық қауымдастықты күш біріктіруге және жаһандық бастамаға қосылуға шақырды. Олар бұл іс-қимыл платформасының мақсаты мемлекеттерді ортақ жауапкершілік – халықаралық гуманитарлық құқық бойынша өз міндеттемелерін сақтау төңірегінде біріктіру болып табылатынын атап өтті.
Женевадағы БҰҰ жанындағы ҚР Тұрақты өкілі Ерлан Әлімбаев бейбітшілік орнату және сенімді нығайту үшін түрлі бастамаларды ілгерілету, сондай-ақ гуманитарлық көмек көрсету бойынша Қазақстанның тәжірибесімен бөлісе отырып, барлық елдерді бейбітшілікті құруға тартудың және ХГҚ сақтау мәдениетін қалыптастыру мақсатында алдын алу шараларын қабылдаудың маңыздылығын атап өтті.
Халықаралық Қызыл крест комитетінің президенті Мирьяна Сполярич жоғары деңгейдегі іс-шарада сөйлеген сөзінде халықаралық гуманитарлық құқықты сақтауға берік міндеттеме адам шығыны мен соғыстардың салдарын азайту үшін өте маңызды екенін атап өтті. Ол алдағы екі жыл ішінде осы бастаманы жүзеге асыру бойынша жұмыс жоспары туралы бөлісіп, бұл, сайып келгенде, соғыс ережелерін сақтауды жақсарту туралы хабардарлықты арттыратынына үміт білдірді.
Өз үндеуінде М.Сполярич Женева конвенциялары осы қалада 75 жылдан астам уақыт бұрын қабылданғанын және бүкіл әлем оларды қазіргі және болашақ ұрпақ үшін сақтауға ұжымдық жауапкершілікте екенін еске салды.
Іс-шараға БҰҰ-ға мүше 80-нен астам мемлекеттің екі жүзге жуық өкілдері қатысып, Жаһандық бастама бойынша бірлескен жұмысқа жоғары қызығушылық танытты және алты елдің бастамасын толықтай қолдады.
Халықаралық гуманитарлық құқыққа саяси міндеттемені нығайту жөніндегі жаһандық бастаманы Бразилия, Иордания, Қытай, Қазақстан, Франция және Оңтүстік Африка Халықаралық Қызыл крест комитетімен бірлесіп 2024 жылғы қыркүйекте жариялады.
Дереккөз: ҚР СІМ баспасөз қызметі
