«Брюссель-Еуропа» баспасөз клубында Қазақстанның көпвекторлы саясатын қоса алғанда, Азия елдерінің сыртқы саясатын зерттеуге арналған Оливье Арифонның «Баяндау арқылы дипломатия – Азиядағы жаңа жұмсақ күш» кітабының тұсаукесері өтті.
Бельгия мен ЕО-ның геосаясат және дипломатия саласындағы ғылыми-академиялық топтары, еуропалық институттар, дипломатиялық корпус, үкіметтік емес ұйымдар мен БАҚ өкілдерінің қатысуымен өткен іс-шараға Қазақстанның Бельгиядағы Елшісі Марғұлан Баймұхан мен ҚР Елшілігінің дипломаттары қатысты.
Кітаптың едәуір бөлігі мемлекеттіліктің қалыптасу тарихына және еліміздің көпвекторлы саясатына арналғанын, сондай-ақ Қазақстанның «орта держава» ретінде қалыптасуын көрсететінін ескере отырып, М. Баймұхан бұл еңбек Қазақстан-Еуропа қатынастарын зерделеуге, дамытуға және нығайтуға мүдделі сарапшылар мен дипломаттар үшін белгілі бір қызығушылық тудырады деген пікір білдірді.
Қазақ дипломаты О. Арифонға еліміздің қазіргі сыртқы саясатына, оның тарихына және әлемдік күн тәртібіндегі өзекті мәселелер бойынша ұстанымына қызығушылық танытқаны үшін алғысын білдірді. Ол сондай-ақ ҚР Президенті Қасым-Жомарт Тоқаевтың бастамасымен еліміздің одан әрі тұрақты дамуы мен экономикалық өсуіне негіз қалайтын экономикалық және саяси реформалар туралы айтып берді.
М. Баймұхан аудиторияны көлік, энергетика және сауда саласындағы ағымдағы өзара іс-қимылдың негізгі салаларын белгілей отырып, Қазақстанның Еуропалық одақпен ынтымақтастығын дамыту перспективаларымен таныстырды. Өз кезегінде О. Арифон кітаптың тұсаукесерін дайындауда көрсеткен қолдауы үшін Қазақстан Елшілігіне өл алғысын білдірді.
Кездесу соңында жиналғандардың Қазақстанға деген қызығушылығын көрсеткен сұрақ-жауап сессиясы өтті.
Оливье Арифон – Лилль католиктік университетінің саяси коммуникациялар профессоры, Брюссельдегі кеңесші қызметін біріктіреді. Бұрын ол коммуникация бойынша компаниясын құрып, Мюнхенде университеттік ынтымақтастық атташесі болып жұмыс істеген. Зерттеуші ретінде 20 жыл Еуропа мен Азия елдерінде жұмыс істеді. «Қытай саясатына шолу: жұмсақ күш, байланыс, ықпал» кітабын шығарды» (Le récit politique chinois: Soft power, communication, influence. L’Harmattan, 2021).
Дереккөз: ҚР СІМ баспасөз қызметі
