Қазақстанда республикалық репродуктивті денсаулық апталығы басталды, – деп хабарлайды satmedia.kz тілшісі Орталық коммуникациялар қызметіне сілтеме жасап.

Оның мақсаты – репродуктивті денсаулыққа саналы түрде және жауапкершілікпен қарау мәдениетін қалыптастыру, сондай-ақ жыныстық өмірдің ерте бастау мен жыныстық жолмен берілетін инфекциялардың қаупі туралы ақпарат тарату.

ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссия төрағасының орынбасары, ҚР Парламенті Сенаты Төрағасының кеңесшісі Жұлдыз Ысқақованың айтуынша, соңғы 5 жылда елімізде 18 жасқа дейінгі қыздар арасында жүктіліктің 12 мыңға жуық жағдайы тіркелген. 15-19 жас аралығындағы жасөспірімдердің үштен бірі жыныстық тұрғыдан белсенді, бірақ БҰҰ қорының халық саласындағы зерттеулеріне сәйкес, шамамен 90% АИТВ және ЖИТС туралы біле бермейді. Денсаулық сақтау министрлігінің зерттеулеріне сәйкес, инфекция белгілері бар жастардың 60%-дан астамы медициналық көмекке жүгінбейді.

«Апта аясында бүкіл ел бойынша жастар денсаулық орталықтары мен алғашқы медициналық-санитарлық көмек ұйымдарында ашық есік күндері, тақырыптық дәрістер, тренингтер мен интерактивті сессиялар, онлайн-вебинарлар өткізу жоспарланған. 12-16 мамыр аралығындағы әр күн жеке тақырыптарға арналады. Олардың ішінде отбасын жоспарлау, әйелдер, ерлер және жасөспірімдер денсаулығы, жыныстық жолмен берілетін инфекцияларға қарсы іс-қимыл және адам папиллома вирусы бар», – деді спикер ОКҚ алаңында өткен баспасөз конференциясында.

Апталық қорытындысы бойынша акцияның барлық қатысушыларынан ұсыныстар жиналып, осы саладағы саясатты одан әрі жақсарту бойынша ұсынымдар дайындалады.

Дереккөз: ortcom.kz