БҰҰ Есірткі құралдары жөніндегі комиссиясының 68-ші сессиясы аясында Қазақстан «Кешіктірудің құны: жаңа психоактивті заттар қаупіне жедел жауап беру – есірткіге сұранысты азайтудың негізгі факторы» тақырыбында сайд-ивент ұйымдастырды. Іс-шараны ұйымдастыруға Орталық Азиядағы есірткімен күрес жөніндегі бағдарламасы (CADAP) және БҰҰ Есірткі және қылмыс жөніндегі басқармасы (UNODC) ат салысты.
Қазақстанның Венадағы халықаралық ұйымдар жанындағы Тұрақты өкілі Мұхтар Тілеуберді сайд-ивенттің ашылуында сөйлеген сөзінде жаңа психоактивті заттардың таралуына қарсы күресте халықаралық ынтымақтастықтың жоғары маңыздылығын атап өтті. Осы тұрғыда Елші қазақ дипломатиясының жақында қол жеткізген жетістігі – БҰҰ Бас Ассамблеясының Алматы қаласында Орталық Азия мен Ауғанстанға арналған Тұрақты даму мақсаттары жөніндегі БҰҰ Өңірлік орталығын құру туралы қарарын қабылдауына назар аудартты. Бұл бастама 2030 жылға дейінгі Тұрақты даму күн тәртібін ілгерілетуге, өңірлік ынтымақтастықты нығайтуға, сондай-ақ негізгі әлеуметтік-экономикалық және қауіпсіздік мәселелерін шешуге деген ортақ ұмтылысты көрсетеді.
Іс-шараның негізгі спикерлері ретінде БҰҰ Есірткі және қылмыс жөніндегі басқармасының өңірлік өкілі Оливер Штольпе және Орталық Азияда есірткінің таралуын болдырмау жөніндегі Еуропалық одақ бағдарламасының (CADAP) директоры Эрнест Робелло қатысты.
Іс-шара барысында ҚР Бас прокуратурасының, Ішкі істер, Денсаулық сақтау және Әділет министрліктерінің өкілдері жаңа психоактивті заттардың таралуына қарсы күрес бойынша ұлттық бастамалар туралы баяндамаларын жасады. Олар құқықтық реттеу, құқық қорғау органдарының инновациялық әдістері, сот сараптамасы және нашақорлықты емдеу бағдарламалары сияқты ауқымды мәселелерді қамтыды. Сонымен қатар «Хақ-Назар» үкіметтік емес ұйымының өкілі нашақорлықтың алдын алу және тәуелді адамдарды оңалту бойынша азаматтық қоғаммен өзара іс-қимыл жүргізу тәжірибесімен бөлісті.
Іс-шара шетелдік делегациялар мен халықаралық ұйымдардың үлкен қызығушылығын тудырып, көтерілген тақырыптың өзектілігін және осы салада бірлескен іс-қимылды күшейтудің маңыздылығын дәлелдеді.
Дереккөз: ҚР СІМ баспасөз қызметі
