БҰҰ штаб-пәтері Бесінші Дүниежүзілік көшпенділер ойындарының қорытындыларын БҰҰ Бас Ассамблеясының ресми құжаты ретінде таратты: https://docs.un.org/ru/A/79/668.
Аталған құжат Әзербайжан, Беларусь, Қазақстан, Қырғызстан, Мажарстан, Моңғолия, Ресей, Түрікменстан және Өзбекстанның тұрақты өкілдері атынан БҰҰ Бас хатшысына бірлескен хат ретінде ұсынылды. Бұл құжат БҰҰ-ның алты ресми тіліне аударылып, БҰҰ Бас Ассамблеясының 79-сессиясы күн тәртібінің «Даму және бейбітшілікке бағытталған спорт» атты 12-тармағы аясында жарияланды.
2024 жылғы 8-13 қыркүйек аралығында Қазақстан астанасында ЮНЕСКО қамқорлығымен өткен Бесінші Дүниежүзілік көшпенділер ойындары ұлттық спорт түрлері бойынша әлемдегі ең ірі жарысқа айналды. Қазақстан Республикасының Президенті Қасым-Жомарт Тоқаев атап өткендей: «Көшпенділер олимпиадасы дала өркениетін жер жаһанға паш етеді».
Ойындар 89 елден келген 2500-ден астам спортшыны жинап, қатысушылар мен көрермендерді достық пен құрмет рухында біріктірді. Бұл жарыстар бүкіл әлемдегі қауымдастықтарға қатысты мәселелерді шешудегі жаһандық ынтымақтастықтың айқын үлгісіне айналды.
Ойындар бағдарламасына шеберліктің жоғары деңгейін көрсететін және Орталық Азия мен басқа өңірлердің көшпелі мәдениеттерінің бай әрі ерекше мұрасын дәріптейтін 21 спорт түрі енгізілді. Олар бейбітшілік, тұрақтылық және түрлі этникалық пен мәдени топтар арасындағы ынтымақтастық құндылықтарын ілгерілетуде маңызды рөл атқарып, адамзаттың бірлігі мен ортақ тағдырын бейнелейді.
Сонымен қатар Ойындар бүкіл әлемдегі байырғы халықтар үшін ерекше маңызға ие болып, олардың дәстүрлері мен мәдени ерекшеліктерін сақтау және дәріптеу үшін платформа ұсынды. Бұл Ойындар байырғы қауымдастықтардың мәдени тұрақтылығын нығайтуға және олардың тілі мен мәдениетін сақтауға қатысты қиындықтар туралы хабардарлықты арттыруға ықпал етеді. Бұл ойындардың инклюзивтілігі байырғы халықтардың мәдени мұрасын қалыптастырудағы маңыздылығын көрсетіп, олардың құндылықтары әлемдік мәдениеттің ажырамас бөлігі екенін дәлелдейді.
БҰҰ құжатында Дүниежүзілік көшпенділер ойындарының елдер арасындағы ынтымақтастықты нығайтуға, әртүрлі мәдениеттердің дамуына және тұрақты өркендеуге қосқан маңызды үлесі ерекше аталып өтті. БҰҰ бұл ойындардың мәдениетаралық диалогты нығайтуға және материалдық емес мұраны сақтауға қосқан үлесін мойындап, олардың Ұйым мақсаттарына жетудегі рөлін айқындады.
Осылайша, бұл ойындар спорт пен мәдениеттің бүкіл адамзат үшін біріктіруші күш бола алатынын көрсетіп, БҰҰ-ның инклюзивті және үйлесімді әлем құруға деген ұмтылысын бейнелейді.
Осы бастаманы жалғастыра отырып, Қазақстанның БҰҰ жанындағы Тұрақты өкілдігі бұл құжатты шет елдердің дипломатиялық миссиялары арасында таратып, оны БҰҰ платформасында ілгерілету жұмыстарын жалғастырады.
Дереккөз: ҚР СІМ баспасөз қызметі
