Қазақстанның Словакиядағы Елшілігінде Абай Құнанбайұлының шығармашылығына арналған әдеби кеш өтті.

Ұлы қазақ философы және ағартушысының 180 жылдық мерейтойына орай ұйымдастырылған іс-шараға Словакияның академиялық және шығармашылық интеллигенциясының өкілдері көптеп жиналды. Олардың қатарында Словакияның Қазақстандағы бұрынғы елшісі Петер Юза, словакиялық ұлттық мәдени-ағарту қоғамы «Матица Словенска» өкілдері Петер Швантер мен Лукаш Перник, «Нове слово» клубының мүшелері, сондай-ақ Абайдың «Қара сөздерін» словақ тіліне аударған аудармашы Катарина Стрелкова да болды.

Қазақстанның Братиславадағы Елшісі Жанна Сағынова іс-шараны ашу барысында: «Абай Құнанбайұлы – жай ғана ақын емес, ол – қазақ халқының рухани жаңғыруының символы, ағартушылық, әділдік пен адамгершілік туралы идеялары бүгінгі күнге дейін өзектілігін жоғалтпаған ұлы философ. Біз Абай шығармаларының словақ тілінде жарық көруі словак оқырмандарына қазақ халқының тарихын, қазіргі Қазақстанды тереңірек түсінуге көмектеседі деп үміттенеміз. Бұл біздің халықтарымыз бен елдерімізді одан әрі жақындата түседі», – деп атап өтті.

Кеш қонақтары Абай Құнанбайұлының ақын, философ, гуманист әрі жазба қазақ әдебиетінің негізін қалаушы ретіндегі сан қырлы шығармашылығымен танысты. Ұлы ойшылдың ағартушылықтың, тәрбиенің және рухани дамудың маңыздылығы жөніндегі терең ойлары аталып өтіп, олардың қазақ халқының моральдық кодексіне айналғаны ерекше айтылды.

П.Юза өз сөзінде: «Абайдың мұрасы Қазақстан шеңберінен әлдеқайда асып түседі – оның даналығы мен гуманистік идеялары бүкіл адамзатқа тиесілі. Ол көтерген биік моральдық құндылықтар, білімнің маңызы мен бірліктің күші туралы ойлары үйлесім мен рухани дамуға ұмтылған жандарға әлі күнге дейін шабыт береді», – атап өтті.

«Матица Словенска» Словакия әдеби институтының өкілі Лукаш Перник Абай шығармашылығын көрнекті словак тұлғаларының еңбектерімен салыстырды:

«Абайдың үлкен мен кіші болсын, жасампаздықтың маңыздылығы туралы ойлары, сондай-ақ еңбектің және білімнің ұлт дамуының негізі ретіндегі рөлі Людовит Штурдың (атақты ақын, жазушы, философ, словак әдеби тілінің негізін қалаушы) идеяларымен үндеседі. Абайдың бейбітшілік пен гуманизмге толы үндеулері Ян Коллардың (саясаткер, ақын, философ, ағартушы, словак және чех ұлттық жаңғыруының көрнекті өкілі) еңбектерінен өз көрінісін табады, ал табиғаттан шабыт алған философиялық толғаныстары Богдан Грабонь (фольклорист, ақын) мұрасын еске салады».

Кеш барысында словак көрермендерге Абайдың «Қара сөздерінің» словак тіліндегі аудармасынан үзінділер, сондай-ақ оның музыкалық шығармалары ұсынылды. Олардың қатарында «Мамыр түні» күйі, «Көзімнің қарасы» әні және қобызда орындалған танымал әуендерден попурри болды.

Кеш соңында қатысушыларға Қазақстанның Братиславадағы Елшілігінің қолдауымен жарық көрген Абайдың словақ тіліндегі «Қара сөздері» басылымы естелік сый ретінде тарту етілді.

Дереккөз: ҚР СІМ баспасөз қызметі