АҚШ-тағы Қазақстан елшілігі АҚШ-тың шекара қауіпсіздігін нығайтуға және заңсыз көші-қонды азайтуға бағытталған көші-қон саясатының қатаңдауына байланысты мәлімдеме жасады.
Дипломатиялық өкілдік осыған байланысты АҚШ аумағында жүрген қазақстандықтарды америкалық билік органдарының өзекті талаптарын сақтауға шақырды.
«Құрметті АҚШ аумағында жүрген Қазақстан Республикасы азаматтары! Америкалық билік қабылдаған шаралар елге заңсыз келген шетелдіктерге (қолданыстағы визасыз немесе грин-картасыз келген адамдар) және АҚШ аумағында заңсыз жүрген мигранттарға қатысты. Құқықтық шаралармен қатар (қамауға алу, елден шығару және АҚШ-қа қайта кіруге шектеулер қою сияқты), әлеуметтік жәрдемақылар, жұмысқа рұқсат құжаттары және басқа да жеңілдіктердің күші жойылатын болады», – делінген хабарламада.
Елшілік баспасөз қызметі мәліметінше, америкалық билік қабылдаған шаралар елде заңсыз жүрген шетел азаматтарына, оның ішінде қолданыстағы визасыз немесе грин-картасыз келген адамдарға қатысты.
«Біз АҚШ билігінің елде болуға заңды негіздері жоқ (қолданыстағы визаның, тұрақты тұруға рұқсаттың (грин-карта) және басқа да құжаттардың болмауы) шетел азаматтарына АҚШ аумағын ерікті түрде тастап шығу мүмкіндігін беретінін еске саламыз. Бұл шара азаматтарға елден мәжбүрлі түрде шығару және АҚШ визасына қайта өтініш берген кезде елге кіруге тыйым салу рәсімінен аулақ болуға мүмкіндік береді», – деп нақтылады елшілік.
