Ақмола облысында полицейлер жол қозғалысы кезінде инсульт алған жүргізушіні дер кезінде байқап, оның өмірін сақтап қалды.

Степногорск – Заводской тас жолында патрульдеу барысында Степногорск қалалық полиция басқармасының патрульдік полиция взводының қызметкерлері А. Смағұлов пен А. Аяғанов, сондай-ақ Ақсу қалалық полиция басқармасының бастығы А. Урустюмов траекториядан ауытқып келе жатқан көлікті байқайды.

Жүргізушіге шұғыл көмек қажет болуы мүмкін деп күдіктенген тәртіп сақшылары көлікті тоқтатып, жағдайды анықтауға кіріседі. Күдік расталып, рөлдегі ер адамның жағдайы күрт нашарлағаны белгілі болды. Ол есінен танып, айналасында не болып жатқанын түсінбеген. Полицейлер жүргізушінің инсульт алуы мүмкін деп болжап, жедел әрекет етті.

Уақытты жоғалтпай, тәртіп сақшылары жедел жәрдем шақырып, оқиғаның төтенше жағдай екенін хабарлайды. Сонымен қатар, ер адамға таза ауа беріп, алғашқы көмек көрсетуге тырысады. Оның жанында болған жұбайы қажетті дәрі-дәрмектердің қайда екенін айтып, полицейлер оларды дереу тауып береді.

Жылдам әрі кәсіби әрекеттің арқасында жүргізуші медициналық көмек алып, өмірі құтқарылды. Бұл оқиға – полиция қызметкерлерінің төтенше жағдайда азаматтарға алғашқылардың бірі болып көмекке келетінінің айқын дәлелі.

Дереккөз: Polisia.kz