Қазақстан делегациясы Эфиопия мен Кениядағы (қоса атқарушы) ҚР Елшісі, Африка одағындағы ҚР Тұрақты өкілі Барлыбай Садықовтың жетекшілігімен 2025 жылғы 15-16 ақпанда Аддис-Абебада өткен Африка одағына (АО) мүше мемлекеттер басшыларының жыл сайынғы 38-ші саммитіне қатысты.
Саммитке АО-ға мүше 55 мемлекеттің делегациялары мемлекет және үкімет басшылары, сыртқы істер министрлері деңгейінде, сондай-ақ бірқатар халықаралық ұйымдардың басшылары, соның ішінде БҰҰ Бас хатшысы А.Гутерриш, Палестина Президенті М.Аббас, Барбадос Премьер-министрі М.Моттли және Африка одағы жанындағы бақылаушы мемлекеттердің жоғары лауазымды өкілдері қатысты.
38-ші саммиттің басты тақырыбы – «Африкалықтар мен африкалық текті адамдарға келтірілген залалды өтеу арқылы әділдік орнату» деп жарияланды. Бұл жиын Африка мен африкалық диаспора үшін өтемақы күн тәртібін іске асырудағы маңызды кезең болып, тарихи әділдікті қалпына келтіруге және тең құқықты болашақты қамтамасыз етуге бағытталды.
Саммиттің негізгі мәселелеріне АО жоғарғы басшылығын сайлау, континенттің бірнеше елдеріндегі, оның ішінде ДР Конго мен Судандағы қақтығыстарды реттеу, Африка одағының «Үлкен жиырмалық» (G20) саммитіне қатысуы, БҰҰ Қауіпсіздік Кеңесін реформалау, Африка құрлықтық еркін сауда аймағы туралы шартты іске асыру, климаттың өзгеруіне қарсы күрес, Африкалық гуманитарлық және рейтингтік агенттікті құру, Құлдықты, депортацияны және отаршылдықты адамзатқа қарсы қылмыс ретінде тану бойынша Панафрикалық конгреске, сондай-ақ АИТВ/ЖИТС бойынша саммитке дайындық кірді.
Саммит қорытындысы бойынша бірқатар құжаттар қабылданды. 2025-2026 жылдарға АО төрағасы ретінде Ангола Президенті Ж.Лоренсу, ал АО Комиссиясының төрағасы ретінде Джибутидің Сыртқы істер және халықаралық ынтымақтастық министрі М.Юсуф сайланды. 2026 жылдың тақырыбы ретінде «Орнықты сумен жабдықтау және қауіпсіз санитариялық жүйелерді қамтамасыз ету» деп жарияланды.
Саммит аясында Қазақстан Елшісі Б.Садықов Кенияның Министрлер кабинетінің Премьер-хатшысы – Сыртқы және диаспоралық істер министрі М.Мудавади, Руанда Сыртқы істер министрі О.Ндухунгирехе, Конго Республикасының Сыртқы істер министрі Ж. Гакоссо, Сейшел Республикасының Сыртқы істер министрі С.Радегонде және Сомали Сыртқы істер министрлігінің тұрақты хатшысы Х.Хаадоумен кездесулер өткізіп, екіжақты ынтымақтастықтың жекелеген мәселелерін талқылады.
Қазақстан 2013 жылдан бастап АО-да бақылаушы ел болып табылады.
Дереккөз: ҚР СІМ баспасөз қызметі
