Қазақстанның Мажарстандағы Елшісі Абзал Сапарбекұлы Мажарстанның Ауыл шаруашылығы министрі Иштван Надьпен кездесу өткізді.
Кездесу барысында тараптар ауыл шаруашылығы саласындағы қазақ-мажар өзара іс-қимылдың қазіргі жай-күйі мен басым бағыттарын талқылады. Сонымен қатар ауыл шаруашылығы және азық-түлік өнімдерінің өзара саудасын арттыру, мажар компаниялардың агроөнеркәсіптік кешендегі қызметі, сондай-ақ тұқым шаруашылығы, мал шаруашылығы және құс шаруашылығы бойынша бірлескен инвестициялық жобаларды жүзеге асыру мәселелері бойынша пікір алмасты.
Сондай-ақ Қазақстанның Еуропалық одақ елдеріне бал экспорттауға ресми рұқсат алуын ескере отырып, мажар тарапынан қазақстандық балды Мажарстанға экспорттау көлемін ұлғайтуға жәрдемдесу, сондай-ақ қазақстандық ара шаруашылығы өнімдерінің брендін ілгерілету және халықаралық нарықтарға шығару тәжірибесімен бөлісу бойынша қолдау көрсету сұралды.
Елші мажар компаниялармен ауыл шаруашылығы саласындағы ынтымақтастыққа жоғары қызығушылық бар екенін атап өтті. Осы тұрғыда Қазақстанның Мажарстанға Сауда миссиясы сапары (2025 жылғы 17-19 наурыз) қарсаңында екіжақты сауда әлеуетін іске асыру мақсатында бірлескен күш-жігерді жандандырудың маңыздылығы аталып өтті. Сонымен қатар екі елдің іскерлік қауымдастықтарына Қазақстан мен Мажарстан нарықтарында жаңа мүмкіндіктерді іздеуге жәрдемдесу мәселесі қарастырылды.
Өз кезегінде И.Надь Қазақстанның Орталық Азиядағы маңызды әріптес ретінде қалыптасқанын және екі ел арасындағы ынтымақтастықты нығайтуға ерекше көңіл бөлінетінін атап өтті. Осы орайда мажар министрі екі елдің аграрлық субъектілері арасындағы байланыстарды дамытуға, сондай-ақ Қазақстан мен Мажарстанда бірлескен ауыл шаруашылығы жобаларын жүзеге асыруға дайын екенін растады.
Сонымен қатар тараптар ауыл шаруашылығы саласындағы келісімдерді жүзеге асыру бойынша «follow-up» кездесулерін өткізуді мақұлдады. Бұл келісімдер биік және жоғары деңгейдегі соңғы кездесулер аясында, сондай-ақ Қазақстан-Мажарстан экономикалық ынтымақтастық жөніндегі үкіметаралық комиссия шеңберінде жасалған болатын. Аталған комиссияның 9-шы отырысы биыл Астанада екі елдің ұлттық экономика министрліктерінің төрағалығымен өтеді деп жоспарлануда.
Кездесу соңында сұхбаттасушы тарапқа Қазақстанда жүргізіліп жатқан саяси және экономикалық реформалар, сондай-ақ шетелдік инвесторларды қолдау және инвестициялық ахуалды жақсарту мақсатында Үкімет қабылдап отырған шаралар туралы ақпарат берілді.
Кездесу қорытындысы бойынша тараптар Қазақстан мен Мажарстанның ауыл шаруашылығы саласындағы өзара қарым-қатынасы тұрақты даму динамикасына ие екенін атап өтіп, өзара қызығушылық тудыратын барлық мәселелер бойынша тұрақты диалогты жалғастыруға уағдаласты.
Дереккөз: ҚР СІМ баспасөз қызметі
