1959 жылы Сарыағаш ауданында туылған. Орта мектепті біртірген соң, еңбек жолын 1976 жылы Келес аудандық өрт сөндіру бөлімінде аға нұсқаушы болып қызмет істеуден  бастады. 1977-1978 жылдары Совет армиясы қатарында әскери борышын өтеп, 1978-1980 жылдар аралығында Мәдениет үйінде автоклуб жүргізушісі болып қызмет атқарды. 1980-1990 жылдар аралығында Келес  аудандық  мәдениет бөлімінде әртүрлі қызметте болды. 1989 жылы Шымкеттегі Әл-Фараби атындағы мәдениет – ағарту институтының «мәдени – ағарту жұмыстарын ұйымдастырушы методисі» факультетін бітіріп, 1990 жылдан 1994 жылға дейін Сарыағаш аудандық мәдениет үйінің директоры қызметін атқарды.

1994 – 1997 жылдары Келес аудандық мәдениет бөлімінің меңгерушісі, 1997 жылдың маусым айынан 1999 жылдың желтоқсанына дейін Сарыағаш аудандық мәдениет бөліміне қарасты Абай ауылдық мәдениет үйінде директор қызметін атқарды. 1999 жылдан 2009 жылға дейін  Сарыағаш аудандық Мәдениет және тілдерді дамыту бөлімінің басшысы болып, 2010 жылы «Сәт» Медиа – Холдинг» ЖШС негізін қалады. Содан 2014 жылға дейін «СӘТ» телеарнасының бас редакторы қызметін атқарды.

А.Мырзахметов аудан көлемінде атқарған қызметтерінде өз ісінің білгір маманы екендігін дәлелдей отырып, өзінің мықты басшы екендігін танытты. Облыс көлемінде ұйымдастырылған мәдени іс-шаралардың жоғары деңгейде өтуіне тікелей жауапты басшы ретінде тың ой, жаңашыл идеяларымен өз үлесін қосып отырған.

Осы еңбектің арқасында:

– 1998 жылы Қазақстан Республикасының білім, мәдениет және денсаулық сақтау министрлігінің құрмет грамотасымен,

– 2000 жылы Мәдениет  комитетінің құрмет грамотасымен,

– Оңтүстік Қазақстан облысы әкімшілігі Мәдениет  басқармасының алғыс хатымен және «Түркістанға -1500 жыл» төсбелгісімен,

– Қазақстан Республикасы ішкі әскерлерінің  мақтау грамотасымен және «Қайсар» төсбелгісімен,

– 2002 жылы облыстық мәдениет басқармасының Алғыс хатымен,

– 2003 жылы «Ауыл жылына»  арналған «Ауыл мәдениеті- ел мәдениетінің тірегі» атты өнер байқауына белсене қатысқаны үшін облыстық мәдениет басқармасының Алғыс хатымен марапатталды.

Ал, 2004 жылы «Балауса-2004» байқауына қатысқаны үшін Оңтүстік Қазақстан облыстық әкімшілігі М.О.Әуезов атындағы Оңтүстік Қазақстан мемлекеттік университеті және Х.Яссауи атындағы ХҚТУ Шымкент институтының  Алғыс хатын, Оңтүстік Қазақстан облысының әкімі Б.А.Жылқышиев пен М.Әуезов атындағы Оңтүстік Қазақстан мемлекеттік  университетінің ректоры, ҰҒА академигі, т.ғ.д профессор У.К.Бишімбаевтар тапсырды.

Сонымен бірге ол облыстық мәнедиет  басқармасының және аудан әкімінің бірнеше алғыс хаттарының иегері.

– 2004 жылы Қазақстан Республикасының Мәдениет министрлігі мен  Қазақстан Республикасы мәдениет пен өнерді қолдаудың  мемлекеттік Қорының «Мәдениет қайраткері» құрмет белгісімен марапатталды.

– 2004 жылы 10 желтоқсанда Қазақстан Республикасы президентінің жанындағы мемлекеттік қызмет академиясы, Мемлекеттік қызметшілердің біліктілігін арттыру институты «Қазақстан Республикасы Президентінің » мәдениетті дамыту проблемалары» мемлекеттік қызметшілердің біліктілігін арттыру семинарының бағдарламасын нәтижелі аяқтағаны жөнінде куәландырды.

– 2005 жыл Қазақстан Республикасының Ата заңының 10 жылдық мерекесінің құрметіне  Асқар Рүстемұлына Қазақстан Республикасы Конституциясының мерекелік медалі салтанатты түрде табысталды.

– 2005 жылы 4 желтоқсандағы Қазақстан Республикасының президентін сайлау науқанында Н.Ә.Назарбаевқа  кандидат ретінде белсенді қолдау көрсеткені үшін Қазақстан Республикасы Президенті Нұрсұлтан Әбішұлы Назарбаевтың Алғыс хатымен марапатталды.

Асқар Мырзахметов жұбайы Айманмен үш ұл,  бір қыз тәрбиелеп өсірген үлгілі отағасы, әріптестеріне қадірлі, қызметтестеріне сыйлы бола білді.